中環怡和大廈嘅美食熱點BaseHall ，不同一般Food Court全是連鎖店，而係雲集咗各式各樣嘅特色菜館或酒廊，令大家可以享有與別不同嘅美食體驗。 近日，Basehall引入三間人氣食店，當中包括主打中東風味嘅餐廳 FRANCIS、推出限定美式Mac & Cheese嘅Grub 1842，以及主打一系列市面少見美酒嘅精緻酒廊WineHouse by BaseHallBar！作為愛吃嘅上班族，一定不可錯過！ 新店一：FRANCIS 特拉維夫中東風情 最新進駐嘅食店係灣仔中東餐廳FRANCIS，店子餐飲靈感源自以色列特拉維夫嘅街頭美食，由以色列主廚 Asher Goldstein主理。 當中，必食招牌菜Rotisserie 烤雞，以百里香辣雞配「穆達達拉」五香米飯，雞肉香嫩多汁，飯內又加有扁豆及焦糖洋蔥，非常香口。 此外，特拉維夫亦流行食Manti 餃子，餃子可揀羊肉或素食餡料，拌有酸奶及番茄醬，一口一粒，好過癮！ 嫌唔夠喉？又可嘗Beef Shawarma，係中東黎凡特地區出名嘅肉類料理，喺特製烤餅上加有牛肉薄片，佐以香料炒香嘅洋葱和特製醬汁，味道特別又可口。 新店二：Grub 1842 限定快閃美食 經典Mac & Cheese就用咗格呂耶爾白醬、莫澤雷勒芝士、蒜味麵包粒和蛋黃作主要材料，味道香濃，口感豐富！ 自創口味之中，最特別係Black Mac ，用上墨汁、格呂耶爾白醬、莫澤雷勒芝士和螢烏魷魚，睇上去黑媽媽，外觀不太討好，但鮮味十足，好有驚喜！ Red Mac就加入紅麴米，帶有微微酸度，配上辣肉腸粒，比較惹味。 至於Burrata Shroom Mac，則係小編至愛，豉油汁煮松茸加馬蘇里拉芝士，松茸香甜，馬蘇里拉芝士香滑濃郁，非常特別！ 新店三：WineHouse by BaseHall Bar 愛酒者烏托邦 WineHouse by BaseHall Bar由香港文華東方酒店主理，引入多量市面少見嘅精選美酒，各傳統年份美酒，以至日本特別酒水均有， 每杯價錢由HK$35至HK$100不等，係品酒愛好者嘅理想好去處。 其中，小編心水之選就係來自法國嘅”Sparkilng”，口感介乎Sake至Sparkilng之間，爽口又香醇，非常獨特。 至於另一款產自希臘Santorini嘅Assyrtiko葡萄酒，酒體亦清新、果香重，極易入口，好適合夏天飲用。 【詳情】 BaseHall 營業時間：星期一至六 11:00am – 11:00pm；星期日全日休息地址：中環康樂廣場1號怡和大廈B1樓1號舖IG：@basehallhk | FB：@basehallhk
K11 Musea近來愈來愈多特色餐廳進駐，近日就迎來新貴”G Room” ！主打新派西班牙菜，再融入亞洲美食元素，地中海菜與東南亞滋味碰撞，為味蕾帶來全新體驗！ 此外，店子嘅裝潢都別具特色，360ᐤ圓弧型嘅餐廳牆身，均設置超高清屏幕，隨著音樂變化，屏幕仲會顯現不同場景， 如香港夜景、各歐洲著名景點、森林、海洋、花海……一頓飯時間，即帶人穿梭不同地方，滿滿嘅視覺享受！ G Room最大特色係將藝術與科技融入餐飲！圓弧型格局，牆身均設置咗360ᐤ 超高清屏幕，伴隨音樂起動，會轉換多款定制動態影像， 畫面細膩逼真，令人有猶如身臨其境嘅感覺！其中，小編最愛自然系主題，如海洋主題、寧靜森林、海濱日落，有種令人遠離煩囂嘅感覺！ 香港維多利亞港景都唔錯，可以以俯視角度，多角度欣賞東方之珠之美，非常獨特！ 此外，亦有一系列歐洲各熱門景點場景，比我感覺好似置身威尼斯河畔、意大利海島嘅感覺，止旅遊癮無難度！ 至於餐飲，G Room則以地中海菜色為範本，再加入東南亞風味，集百家之長，為味蕾帶來全新體驗。地中海料理出名多海鮮，其中西班牙嘅Paella更係其中佼佼者！ 不同一般Paella，G Room嘅做法係用咗中式炒飯底，飯粒吸收晒海鮮汁，好鮮味！無傳統Paella咁油膩，呢款嘅飯較乾身，飯中間仲夾雜咗風乾黑毛豬火腿及魷魚圈，幾有咬口。另外，飯上有原隻波士頓龍蝦，廚師好細心將蟹件都敲碎晒，基本唔洗用手剝殼，就可輕鬆食晒成隻龍蝦。至於龍蝦，經過焗製仍保留到啖淡肉汁，食上口唔錯。G Room版本係用咗原隻波士頓龍蝦，要配焦香亞洲風味炒飯及風乾黑毛豬火腿打造，口感更香口鮮味！ 另一款日本鮑魚海膽炒意粉，融滙咗歐陸及亞洲風味，採用日本空運鮮鮑魚和海膽，再加入橄欖油、大蒜和少許紫蘇葉，鮮味十足。 黑松露伊比利亞火腿配63°C日本溫泉蛋 就採用經36個月天然風乾製成嘅黑毛豬火腿，令鹹香味徘徊於口腔之間，齒頰留香，回味無窮。煙肉烤得乾身香脆，配上溫泉蛋、雜菌、香草及胡椒，成件事都好香口。菜式上仲有即刨黑松露片，非常清香，鮮味，層次感十足。 呢款小食先用蒜片將大蝦爆香，再油泡浸熟，好香好惹味！西班牙菜最靈魂係橄欖油，呢款加蒜片，佐酒一流！ 以香醇嘅西班牙紅白酒、麝香葡萄甜酒及冧酒混合新鮮時令水果，水果嘅酸甜香氣，帶出紅白酒豐盈嘅韻味，非常易入口，唔係飲開酒嘅人都輕鬆駕馭。 【詳情】 G Room Bar & Lounge營業時間：1130am –10pm地址：尖沙咀梳士巴利道18號Victoria Dockside K11 Musea 5樓504號舖IG：@g.room.hk
無得飛嘅日子，Cafe似乎成為人們假期休憩嘅好Hea處。最近佐敦咗一間新茶室”Wonderlous“，結合Cafe、花店及Workshop於一身。 據店員所講，店長正係來臨嘅客人可以得到真正放鬆，休憩一下，所以店子亦唔似一般Cafe般推滿座椅，而係採取預約制，並每節預留2個鐘比大家慢慢Chill。喺現時金錢掛帥嘅開Cafe風潮下，能有咁嘅心態，真係相當佛心呢！ 喺用餐嘅過程，確係非常舒適，唔會好似平時去其他Cafe咁，坐到密質質，左右都係人。唯一個要注意嘅位係訂位人數頗多，好似我咁就提早2星期先Book到位， 聽店員講，而家佢哋要排到5月先有位…大家去時一定要向店家官方IG查詢清楚哦！此外，小編好鍾意店子放滿花草，置身其中都好有去咗外國花園嘅感覺。鍾意可以買花束回家，又或者參加香水調製班，感覺成個設計都係為女生而設，不失為一個閨蜜好去處！ “Wonderlous”只供應簡單嘅啡茶及輕食，主餐則來自隔離餐廳”Hara”（中午12點後才有）。小編來得早，只係嘗過水果茶及窩夫，飲品倒是不錯，食物就只屬一般。 好鍾意呢款茶呈粉紅色，打卡100分！加咗蘋果嘅緣故，茶體偏酸，拌偏甜嘅Waffle嚟食，感覺都唔錯。 【詳情】 Wonderlous 地址：佐敦官涌街4號 IG：@wonderlous.co
西班牙三面環海，喜愛選用各式海鮮、橄欖油、奶酪、魚類、番茄及大蒜等食材，飲食充滿濃郁嘅地中海風情。 鍾情西班牙菜，卻不能前往當地細嘗，何不喺本地覓選正宗菜館，一解口腹之欲？最近，長沙灣福榮街又添新貴，那就是”La Barra Tapas Spanish Restaurant“！ 餐廳主打正宗西班牙菜，主廚Peter更曾花逾8年時間跟西班牙人學師，加上店內菜餚中，大部分食材都自西班牙進口，不論口味及烹調手法都份外正宗！作為西班牙菜控，必不可錯過！ 餐廳名為”La Barra”，喺西班牙語中解作「酒吧」。店長兼主廚指，西班牙酒吧多採用長條形吧檯設計， 以此為概念，打造出開放式廚房，目的係為咗比客人一邊品酒嘗美食，一邊睇住佳餚嘅烹調過程，能與廚師有更多互動及交流。 Paella可以話係西班牙最典型嘅菜式！呢個飯La Barra確係做得出色，只係薄薄一層咁鋪喺鍋底，米粒受熱平均，所以質感份外乾身煙韌！ 此外，米粒充滿吸索海鮮湯汁， 剛焗好放上枱真係鮮香撲鼻！超正！至於海鮮就正常發揮，夠鮮甜。 嚟到當然order埋西班牙地道嘅煎蛋薯條小食。西班牙嘅特色就係會將薯條切成絲狀嚟炸！因為用上味濃而且澱粉含量高嘅荷蘭薯仔， 成件事唔單止更鬆化，而且仲一啲都唔乾柴！La Barra 嘅可樂餅有兩種味道，分別係松露蘑菇可樂餅及魷魚可樂餅，前者加入100%黑松露醬及鵝肝菌製成， 店主仲加入花菇，令可樂餅嘅菇味更突出；後者加入墨魚汁和龍蝦湯炮製，仲有魷魚粒，口感豐富又鮮味，兩款都係佐酒佳品！ 為了塑造正宗西班牙口味，餐廳有九成以上嘅食材，如肉類及海鮮都來自海外入口，更有大部分食材由西班牙直接購入。 另外，西班牙菜特別注重醬汁嘅配搭，因此Peter堅持每日新鮮自家調配醬汁。花盡心思，更不計成本引入多種西班牙新鮮進口食材，一切都反映Peter對於西班牙菜嘅追求和堅持。 【詳情】 La Barra Tapas Spanish Restaurant營業時間：12nn –10pm地址：長沙灣福榮街512-518號地下A號舖IG：@labarra_csw
食蟹唔一定係秋天專利，「上三兩Sexy Crab」蟹麵專門店自進駐尖沙咀K11 MUSEA後，一年四季都會供應時令蟹肉招牌菜， 如特濃蟹粉蟹肉拌拉麵、特濃蟹粉石鍋拌飯、Sex Swing……等等，均加入由大廚設計嘅黃金比例蟹膏醬，加上中西合壁嘅烹調手法，菜式創新又別致！ 另外，每道菜都已經過人手鮮拆蟹粉及蟹肉，可以唔駛剝殼，優雅品嘗鮮蟹菜餚，愛蟹之人一定不可錯過！ 上海鄰近大閘蟹盛產地陽澄湖，食蟹文化源遠流長。至民國上海，食大閘蟹更係一種風尚，不論公母蟹、食蟹動作、食蟹嘅拌菜及飲料都十分講究。 蟹，更成為文人墨客筆下嘅靈感泉源。為咗重現食蟹風尚，Sexy Crab以30年代老上海酒廊為題，如桃木特製餐桌椅組、仿鏽鏡牆、鏡面天花、寶藍窗簾及粉紅霓虹燈等，懷舊與時尚兼容 小編因為呢個蟹粉吊架而慕名而來！真係精致到令人唔捨得食！一個吊架共有四款蟹粉點心，每款各2粒，包括燒和牛配蟹粉、風呂吹大根配蟹粉和魚子醬、慢煮赤雞胸海膽卷配蟹粉， 以及花雕鮮帆立貝配蟹粉。其中，我最愛燒和牛配蟹粉，半生熟和牛，肉味濃郁嫩滑，表面燒得脆口，加上鮮味蟹粉，一鮮一香，口感好正！ 其次，花雕鮮帆立貝配蟹粉都不錯，帆立貝半生熟，啖啖肉，肉中滲透濃濃嘅花雕酒酒香，與蟹粉好襯！ 喺店員建議下，小編又order咗招牌菜式「特濃蟹粉蟹肉拌拉麵」，據說用咗足足12隻大閘蟹嘅蟹粉製成！上枱時，蟹粉配料同麵係分開上，包括雞湯湯配蟹肉、蟹腳肉、蟹公膏、蟹母膏、蟹油，可按個人喜好，自行加入配料， 我就貪心啲，一口氣全部混埋食，膏與黃，口感鮮美又有咬口！至於拉麵，麵質偏硬，我個人較受腍啲嘅麵，所以就一般般。 【詳情】 上三兩 Sexy Crab營業時間：12nn –3pm；6pm-10pm地址：尖沙咀梳士巴利道18號 K11 Musea 4樓 401A號鋪IG：@sexycrabhk | FB：@sexycrabhk
店名”Yukkuri”則結合了日文「Yururi（放輕鬆）」和「Yutori（寬鬆世代）」兩字， 有「慢慢來」的含意，希望每位造訪的人，可盡情享受慢活時光。 店內擺放了大正時期的煤油燈（1912年）、昭和時期的醫療鐵箱、孔雀杢目、古銅鹿、 還有一系列由日本陶藝作家瀨川辰馬製造的手作陶瓷食具，中西元素兼容，處處洋溢文藝氣息。 這兒的器具有的為店家珍藏，亦有可出售的物品，靜待有緣人。 由於新店仍屬試業階段，餐單暫時以輕食為主，提供麵包定食、紅豆湯、自家紅豆厚切吐司、 忌廉夾心麵包、純素飲品及冷泡咖啡等。整體食品均是純素成份， 主打健康路線，不過份量不多，鍾意大魚大肉的朋友就未必滿足。 #Yukkuri #九龍城 #古道具喫茶店 #本地遊 #AEGLifestyle #AEGPromotion
